Nota de prensa enviada aos medios o 16 de outubro de 2026 · VII ForoTelecos Galicia · Vigo
O decano do COETTGA pide participar «cando se lexisla, se planifica, se deseña e se decide», que nos proxectos públicos non conte «unicamente o prezo» e que Galicia non vexa marchar o talento que forma
«Non podemos pedir que se recoñeza unha profesión que non nomeamos»: os telecos galegos esixen que se lles chame polo seu nome
Caballero: «Os enxeñeiros de telecomunicacións fixeron de Vigo o Silicon Valley do século XXI»
- Quen e onde: máis de 170 asistentes no VII ForoTelecos Galicia, no Palacio de La Oliva (Vigo), con representantes do Concello de Vigo, da Xunta e da Universidade de Vigo.
- Que piden: seis reivindicacións, de participar nas decisións tecnolóxicas a que nos proxectos públicos non conte só o prezo, e que se volva chamar «ás cousas polo seu nome: Telecomunicacións».
- Premios Enxeño 2026: Arturo Dopico, Damián Rey, Marta Castro, Alén Space e Carlos Manuel Marcote (Enxeñeiro do Ano), ademais dun recoñecemento especial a Emilia Seoane, a primeira colexiada.
Vigo, 16 de outubro de 2026.
Os enxeñeiros técnicos de telecomunicación galegos queren estar «onde se toman as decisións tecnolóxicas» e non só cando hai que «resolver unha avaría», reclamou este venres en Vigo o seu decano, José Manuel Martínez Pérez, ante as autoridades presentes no VII ForoTelecos Galicia, que reuniu máis de 170 asistentes no Palacio de La Oliva. «Queremos participar cando se lexisla, se planifica, se deseña e se decide», dixo no seu discurso, pronunciado en galego, o decano do Colexio Oficial de Enxeñeiros Técnicos de Telecomunicación de Galicia (COETTGA).
«Hai algo que me preocupa: que, de tanto funcionar en silencio, acabemos sendo invisibles», advertiu José Manuel Martínez Pérez, decano do COETTGA e presidente da Asociación Galega de Graduados e Enxeñeiros Técnicos de Telecomunicacións (AGGETT).
As administracións, na sala
O alcalde de Vigo, Abel Caballero, destacou que «os enxeñeiros de telecomunicacións fixeron de Vigo o Silicon Valley do século XXI. Altísimo nivel tecnolóxico destes profesionais e a súa absoluta solvencia nun mundo no que a comunicación é instantánea». O conselleiro de Facenda e Administración Pública, Miguel Corgos, afirmou que, nun contexto de transformación tecnolóxica e dixitalización como o actual, Galicia non podería estar á altura dos desafíos «se non contara con redes de telecomunicacións adaptadas ao seu territorio e á súa poboación», e subliñou «a importancia estratéxica das telecomunicacións». O decano agradeceu á reitora da Universidade de Vigo, Carmen García Mateo, o traballo conxunto entre a Escola e o Colexio: «É xustamente o que necesitamos: pasar de dicir que hai que colaborar a colaborar de verdade».
O foro, que organizan o COETTGA e a AGGETT e que o colexio define como un evento único e de referencia no sector das telecomunicacións, tamén a escala nacional, abriu con «DriveTest Galicia 5G», o estudo de cobertura móbil que realizaron este ano a AGGETT e o COETTGA co apoio da Axencia para a Modernización Tecnolóxica de Galicia (Amtega): uns 6.000 km percorridos por estrada e ferrocarril, cuxos datos o colexio prevé publicar en aberto. O hipersector TIC galego pechou 2025 con 29.815 traballadores, un 2,5 % máis, segundo a Xunta.
Seis reivindicacións para pasar das palabras aos feitos
- Estar onde se decide. Participar «cando se lexisla, se planifica, se deseña e se decide», porque, dixo o decano, os telecos coñecen «os problemas reais» e poden axudar a «evitar erros antes de que custen tempo e diñeiro».
- Conectividade de calidade en todo o territorio. «Non abonda con que a cobertura apareza nun mapa. Hai que medila, comprobala e mellorala onde non chega como debería».
- Tecnoloxía que funcione de verdade en saúde, seguridade e servizos esenciais: «Debe ser fiable, segura e estar ben deseñada. Porque detrás dun fallo técnico pode haber unha persoa agardando atención, unha resposta ou unha solución».
- Valorar o coñecemento profesional. «Nos proxectos públicos non pode contar unicamente o prezo»: tamén a calidade, a seguridade, a experiencia e a responsabilidade.
- Formar talento e xerar oportunidades. «Non podemos resignarnos a formar persoas excelentes e despois ver como teñen que marcharse para atopar proxectos á súa altura».
- Colaboración que se traduza en feitos entre o Estado, a Xunta, as administracións locais e provinciais, as universidades, as empresas e o Colexio. «Non se trata de repartir reproches nin de facer unha lista de peticións. Trátase de colaborar, aproveitar o coñecemento que xa temos e conseguir que as boas ideas se convertan en proxectos reais».
Como exemplo, o decano puxo a Amtega, cuxo director, Damián Rey, é enxeñeiro técnico de Telecomunicación, segundo destacou, e pediu que ese modelo se estenda «de maneira transversal» ás administracións públicas: «Non se trata de poñer un teleco en cada despacho. Trátase de entender que a tecnoloxía non é un adobío, nin unha ferramenta secundaria, nin algo que se consulta cando xa está todo decidido».
«A primeira forma de enterrar algo, de facelo desaparecer, é deixar de nomealo»
A segunda mensaxe foi para as administracións, as empresas, os medios e as universidades: «Temos que volver chamar ás cousas polo seu nome: Telecomunicacións». E aos propios profesionais expúxolles un reto: dedicar dous minutos ao día (120 segundos, o 0,14 % do día) a contar a alguén que son graduados ou enxeñeiros técnicos de Telecomunicación e a explicar por que importa. «Se nós mesmos non somos capaces de dicir quen somos, non podemos agardar que os demais o saiban».
Premios Enxeño 2026: recoñecemento da propia profesión
A gala entregou os Premios Enxeño, que o decano describiu como «premios que nos damos entre profesionais»: «Quen sobe a recoller un sabe que llo dá a súa propia xente». Os galardoados desta edición son:
- Arturo Dopico: Premio Enxeño á Excelencia na Dirección de Grandes Empresas de Telecomunicación.
- Damián Rey, director da Amtega: Premio Enxeño á Traxectoria Institucional na Administración Pública.
- Marta Castro: Premio Enxeño á Excelencia en Tecnoloxías Disruptivas para as Telecomunicacións. O decano destacou que está «a patentar neuronas fotónicas autosostibles para intelixencia artificial con practicamente ningún consumo enerxético».
- Alén Space: Premio Enxeño á Iniciativa Empresarial, recollido polo seu cofundador, Alberto González. «Desde Galicia tamén se pode innovar, crear empresa e desenvolver tecnoloxía para competir nun sector tan esixente como o espacial», dixo o decano.
- Carlos Manuel Marcote: Enxeñeiro do Ano, un premio «cun valor especial porque o concede a propia profesión».
A velada incluíu ademais un recoñecemento especial, con entrega de ramo, á primeira colexiada, Emilia Seoane. «Ningunha profesión constrúe o seu futuro se esquece a quen abriu camiño antes», sinalou o decano.
«Sigamos facendo o noso traballo. Sigamos chamando ás cousas polo seu nome. E sigamos construíndo telecomunicacións que conectan vidas», concluíu o decano.
O ForoTelecos naceu en Vigo en 2020, pasou polas catro provincias galegas e volve á cidade onde empezou. Conta coa colaboración institucional da Xunta de Galicia, Xacobeo 2027, a Deputación de Pontevedra e o Concello de Vigo, e co patrocinio de PITT, Allied Telesis, Cellnex, Orange, Palo Alto Networks, Televés, Gradiant e Centum.
Sobre o COETTGA. Agrupa os enxeñeiros técnicos de telecomunicación de Galicia e organiza o ForoTelecos Galicia desde a súa primeira edición, en 2020. Entrevistas e declaracións do decano: prensa@coettga.es.
Máis información: www.forotelecos.com · prensa@coettga.es · #ForoTelecosGalicia26
Folla adicional · Premios Enxeño 2026 e premiados
Os Premios Enxeño naceron co ForoTelecos e concédeos a propia profesión: «Son premios que nos damos entre profesionais. Quen sobe a recoller un sabe que llo dá a súa propia xente», explicou o decano, José Manuel Martínez Pérez. Estes son os recoñecementos da VII edición, coas palabras coas que o decano presentou cada un.
| Premio | Premiado | Palabras do decano |
|---|---|---|
| Premio Enxeño á Excelencia na Dirección de Grandes Empresas de Telecomunicación | Arturo Dopico | «Dirixir unha gran empresa significa tomar decisións, asumir responsabilidades e conseguir que moitas persoas traballen cara a un obxectivo común. Hoxe recoñecemos esa capacidade de lideranza nun sector no que o coñecemento técnico debe ir acompañado de visión e responsabilidade». |
| Premio Enxeño á Traxectoria Institucional na Administración Pública | Damián Rey, director da Axencia para a Modernización Tecnolóxica de Galicia (Amtega) | «O recoñecemento ao traballo institucional tamén é un recoñecemento á importancia de conseguir que as administracións evolucionen e respondan aos retos tecnolóxicos da sociedade». |
| Premio Enxeño á Excelencia en Tecnoloxías Disruptivas para as Telecomunicacións | Marta Castro | «A excelencia non consiste unicamente en saber moito ou en facer ben un traballo. Tamén consiste en asumir a responsabilidade de facelo cada vez mellor, con rigor e con respecto polas consecuencias do que facemos». Está «a patentar neuronas fotónicas autosostibles para intelixencia artificial con practicamente ningún consumo enerxético». |
| Premio Enxeño á Iniciativa Empresarial | Alén Space, recollido polo seu cofundador, Alberto González | «Alén Space é un exemplo de como o coñecemento tecnolóxico pode transformarse en actividade empresarial e chegar moito máis aló das nosas fronteiras. Desde Galicia tamén se pode innovar, crear empresa e desenvolver tecnoloxía para competir nun sector tan esixente como o espacial». |
| Enxeñeiro do Ano | Carlos Manuel Marcote | «Este premio ten un valor especial porque o concede a propia profesión. É o recoñecemento dos compañeiros a unha traxectoria profesional e ao que representa para o colectivo». |
| Recoñecemento especial, con entrega de ramo | Emilia Seoane, primeira colexiada | «Ningunha profesión constrúe o seu futuro se esquece a quen abriu camiño antes. […] Nunca chegaremos a agradecer dabondo as barreiras que axudou a derrubar nesta profesión». |
Versión en galego da nota de prensa enviada aos medios en castelán. Fotografía da portada: Raúl Lorenzo Filmmaker.
